Illoqarfiit pillugit

Nanortalik (1)

Nanortalik

Tasiilaq

Kalaallit Nunaanni Nanortalik illoqarfinni kujallerpaavoq. Illoqarfik 1500 miss. inoqarpoq, arfinilinnik nunaqarfeqarluni arlalialunnillu savaatileqarfeqarluni. Katillugit inuit 800 missaat taakkunani najugaqarput. 32 %-it 0-19-it akornanni ukioqarput. Illoqarfinni anginerusutut qaninnerpaaq tassaavoq Qaqortoq, 3.200 missaannik inoqartoq, Kommune Kujallermilu qullersaqarfiulluni. Nanortallup aamma Qaqortup akornanni qulimiguulimmik timmisartorluni 30 min. miss. timmisariaqarpoq, imaluunniit akunnialuit immakkut angalasariaqarluni.

Tasiilaq Tunumiippoq, inuit amerliartuaarlutik 2.000-ingajannik inoqarluni. Ilanngutissapput illoqarfimmut ungaluisut nunaqarfiit tallimat, katillugit 500 sinnitsiarlutik inoqartut. 30 %-it miss. 14 inorlugit ukioqarput. Tasiilaq Kalaallit Nunaanni illoqarfinni avinngarusimanerpaat ilagaat, Kalaallit Nunaata sinneranut Sermersuarmit akunnermioqarnermigut tikikkuminaalluni. Illoqarfinni anginerusuni qaninnerpaaq tassaavoq Islandimi Reykjavik. Islandimit Tasiilaliarluni timmisartorneq (timmisartoq, tulleralugu qulimiguulik) katillugit nal. ak. pingasut missaat sivisussuseqarpoq. Tasiilaq Kalaallit Nunaanni kommunini annerpaap, Kommuneqarfik Sermersuup ataaniippoq, tassani aamma Nuuk illuni.

Illoqarfik Tasiilaq 1894-imi Ammassalittut atserlugu tunngavilerneqarpoq, ukiullu 125 angunagilluunniit europamiunit sunniivigineqanngivilluni. Tunumi kultureqassuseq immikkoortuuvoq, tunumiutut oqaluttoqarpoq, nunatsinni sumiorpaluutit sinnerinut naleqqiullugu allaanerulluinnartumik. Illoqarfik Ittoqqortoormiit 500 inorlugit inoqarfiusoq avannaamut 800 km miss. ungasissusilimmiippoq. Tasiilarlu tassaapput Kalaallit Nunaata Tunuata sineriaani 3.000 km takissusilimmi illoqarfiit marluk kisiartaasut.